Ua amata faaaogā nei vaega o fale o le uafu i Salelologa i Savaii ua toe fausia ma faafou e pei o le nofoaga e faatali ai pasese mo le agai i le vaa, le nofoaga e faamautu iai tamā ma tinā penisione, o le potu mo pasese faapitoa poo le VIP lounge, faapea ma le aofoaga ua iai faleoloa o laulau ma nofoa e faaaogā e pasese ma tagata lautele.
O le vaega foi e tutū ai taavale ua toe faaleleia e pei ona toe faavali ta.
Talu ona see atu le pulea ma le vaaia o uafu i Mulifanua ma Salelologa i le Matagaluega o Fela’ua’iga ma Galuega Tetele a le Malo, o nisi ia o galuega na ave iai le faamuamua o le toe fausia o nisi o vaega o fale e faatali ma faaee ai pasese mo ia uafu o loo faaaogā i aso uma o le vaiaso e le atunuu femalagaa’i i le va o motu o Upolu ma Savaii.
Faaalia i se pepa o faamatalaga mai le matagaluega o fela’ua’iga ma galuega tetele, o se tasi lea o galuega ua sami ai le atoaga o le 25 tausaga talu ona faavae le Pulega o Uafu ma Taulaga.
O le Aso Faraile na te’a nei na umusa ai galuega o fale faaee ma faatali pasese i Salelologa i Savaii, a o galuega sa toe faaleleia ai fale faaee ma faatali pasese i Mulifanua na umusa ma tatala i le tausaga na te’a nei.
O le tausaga e 2022 na faasee atu ai le vaaiga o ia uafu e lua i le matagaluega o fela’ua’iga ma galuega tetele a le Malo.
