O le a tatala i taimi o le Eseta le State Highway 1 e kolosi atu i Brynderwyns agai atu ma toe taliu mai Northland.
O uiga loulouā o le tau i le tausaga talu ai ma palapala solo lea lava na amata tapuni mai ai vaega nei o le Brynderwyns Highway, peitai o le aso ananafi na faamautinoa mai ai e le New Zealand Transport Agency o lea o le a tatala mo aso e 6 a o faamanatu le Eseta.
O le aso a taeao lea o le a tatala ai seia oo atu i le Aso Lua o le vaiaso a sau.
Na maua foi le avanoa o le minisita o femalagaa’iga Simeon Brown e asia ai galuega a o lei tatalaina a taeao mo na o sina taimi.
A o sau ai le tala e tatala mo feoaiga o le Eseta, o loo tuu mai ai foi ma le lapataiga mai le NZTA ia tautuana pa puipui ma faailoilo o loo iai pea i luga o le auala i taimi o le Eseta.
E toe tapuni le auala i Brynderwyns mai le tasi le minute e tea ai le 12 i le vaveao o le Aso Lulu, aso 3 o Aperila.
O loo faamoemoe e tatau ona faamae’aina uma galuega faaleleia o le auala o loo faia pea i le faaiuga o lenei tausaga.
