O se taeao sagisagi fiafia lea o alo ma fanau aemaise le afioaga o Salua Manono ina ua tatala aloaia lo latou faleaoga fou lea na agalelei ai le Malo o Iapani e faatupeina ai lenei galuega.
E $515,000 le tau aofai o lenei galuega e aofia ai potu aoga e ono(6), potu mo faiaoga, potu tusi, ofisa o le Pule Aoga faapea ai ma faleui se’i tulou.
I le sauniga o le tatala aloaia o lenei faamoemoe na saunoa ai le Afioga i le Amepasa o le Malo o Iapani, Keisuke Senta.
“O le itu o aoaoga o se vaega tāua lenei o atina’e a le Malo o Samoa ma e fiafia le Malo o Iapani e tuuina mai lana fesoasoani ina ia faatino nei atina’e auā le soifua manuia o alo ma fanau.
“Ia avea lenei fale aoga e faaosofia ai le fiafia o alo ma fanau e toaaga le aoga ma usitai i mātua ma faiaoga.”
Na faailo ai foi se tasi o meaalofa a le Malo o Iapani o tusiata o loo tusia i le gagana Peretania ma le gagana Iapani.
Na faailoa foi le faafetai a le Malo o Samoa e tauala atu i le Pule Sili o le Matagaluega o Aoga, Aeau Chris Hazelman e tusa ai o lenei faamoemoe.
“E momoli le faafetai i le Malo o Iapani i le agalelei mai i le afioaga ua faataunuuina ai lenei galuega tāua aemaise o le afioaga i la outou lagolago.
“Fai mai le upu e le o le fale a o le anofale ae peitai e lē atoa le aoaoina o alo ma fanau pe a lē atoatoa le faleaoga.
“E le mafai ona iloa e le Malo mea o lo tatou naunau e faatino e manuia ai le afioaga pe a tatou nofonofo ae faafetai i lo outou ola sailimalo.”
O le kamupani faufale a le Evaeva Construction lea sa faatinoina lenei galuega mo le tolu masina.
