Ua tele tausaga o taumafai mai le alii o Wallace Sititi i le taaloga o le lakapi, ma lana moemitiga e fia auai i le All Blacks le ‘au a Niu Sila o loo tausinio uma iai alo ma fanau.

O lea ua taulau lona faamoemoe, ma ua ia tuuina atoa lona selau pasene e faatino ai loa le avanoa ua ia maua i le ‘au a le atunuu.

O le ofi atu o le alii o Wallace Sititi i le All Blacks sa tau faafaigata ona amata lana galuega ona o lea faato’ā ofi atu i totonu o le ‘au, aemaise ai o loo iai nisi o tama tuai o le All Blacks o loo latou taaalo o loo ave iai le faamuamua a le faia’oga le alii o Scott Robertson.

Peitai o le maua ai o le avanoa o Wallace i taaloga faitaulia a le All Blacks na vaaia ai loa e le faia’oga ma le pulega aemaise o le maimoa a le lalolagi atoa i le lelei ma le malosi o lea alo o le atunuu i le faatinoina o le taaloga.

O le taimi nei e pei foliga mai i le silasila a le lalolagi atoa, o le tama taalo numera tasi lea a le All Blacks o lea ua iai, pe a fua iai i le tele o tusitusiga ma faamatalaga o loo agiga i luga o upega tafailagi o loo faailoa ai le lelei o le mafaufau o lea alii i le taaloga.  

O le taaloga a le All Blacks ma le Wallabies sei mavae atu nei na molimauina ai le tulaga lelei o le taalo a le susuga ia Wallace Sititi, ma ua atili ai ona faamautūina lagona o tagata i lea alo o le atunuu e tatau ona ave iai le faamuamua a le faia’oga i soo se taaloga a le All Blacks.

O le taaloga foi lea na pei ua tulimata’i mai ai e nisi o le lakapi liki le NRL lea alo o le atunuu i lona malosi ua tatau ona auai e saili sana kalapu mo le lakapi liki.

Peitai na faailoa e le tuaa o Wallace le afioga ia Lemalu Semo Sititi, e faapea e lē o iai se mafaufau o lona atalii i se isi lava taaloga e pei o le liki, e oo foi ia te ia e lē o iai sona lagona e alu lona atalii i le liki ma na te lē taliaina foi lea vaega. 

O lea o loo fiafia lava Wallace i le lakapi iuni ona ua leva tausaga o taumafai mai lona atalii i le All Blacks.

E lē o iai foi se lagona e talanoa ma le atalii i lea tulaga ona e lē o iai se isi o mafaufau iai, pau le tulaga o loo ave le faamuamua a Wallace i lana ‘au le All Blacks o loo tuu atoa foi iai le lagolago a laua mātua faapea le aiga i le taumafaiga a le atalii.

Saunoa foi Lemalu Semo Sititi ua faailoa e Wallace le tulaga lelei o le māfana o le mafutaga ma tama taaalo i totonu o le ‘au aemaise ai o alo ma fanau o Samoa o loo latou auai faatasi.

E galulue ma felagolagoma’i ma faafesoaa’i i totonu o le ‘au i le faatinoina o le taaloga.