Sa aofia leoleo Niu Sila i le gaioiga tele ua tapunia ai nei se tasi o maketi aupito tele i le lalolagi i luga o upega tafailagi lea e mafai ai ona faaaoga i se tulaga faasolitulafono faamaumauga o tagata ma identities, o se faamatalaga lea mai ofisa faaletulafono i le aso ananafi.
O le Operation Cookie Monster sa faaigoaina ai lea gaioiga tele sa agai sa’o lava i le Genesis Market lea o loo lipotia e faatau ai le silia ma le lua miliona o faamaumauga o tagata.
E 119 tagata ua pueina e leoleo i lenei osofaiga sa galulue faatasi ai le FBI, ma ofisa o leoleo mai atunuu e 17 ma ua faia ai ma osofaiga poo raids e 208 i vaega eseese o le lalolagi.
Fai mai le leoleo asiasi suesue o Stuart Mills o le vaega o le osofaiga i Niu Sila nei na faatino i le Aso Lulu ma pueina ai se alii e 30 tausaga mai le tuatusi na faia iai le osofaiga.
O atunuu sa faaautu iai osofaiga ia e aofia ai Ausetalia, Peretania, Kanata, Amerika ma le silia ma le 10 atunuu o le atu Europa.
