O uiga faaletonu o le tau o loo aafia ai le atunuu ua faailoa ai e le pulega o uafu ma taulaga le tapunia lē tumau o le uafu tele i Matautu i Apia, lea na amata tapuni i le Aso Lua o lenei vaiaso ae lē o iloa se taimi e toe tatala ai.
Ua logoina ai e le pulega i latou uma e masani ona latou faaaogā le uafu i nisi o auaunaga ma tautua aemaise o le atunuu lautele i le faia o lea faai’uga.
O le Aso Lua foi o le vaiaso nei sa molimauina ai galuega sa faia i le uafu i Apia i le faapipiina o le lagisi o loo faia galuega i le ogasami o loo goto ai le manuao o le Manawanui, i le auina ane o le uta muamua o suāuu e utu i tane tetele o loo i le uafu i Apia.
O le mae’a aveesea o lea uta o suāuu mai le manuao ona toe toso lea e le vaa toso vaa i Tafitoala Safata o le lagisi mo le faaauauina o le galuega o le aveesea o suāuu mai le manuao o loo goto ai.
