Ua faailoa e le afioga i le Sui Palemia le afioga Tuala Tevaga Iosefo Ponifasio le tuuina atu i le Kapeneta o le mataupu tau teuteuga o le Tulafono o Faamasinoga o Fanua ma Suafa e tapena ai suiga ma teuteuga o lea Tulafono, i le ofisa o le Loia Sili latou te galulue faatasi ai ma le Matagaluega o Faamasinoga ma Mataupu Tau Faamasinoga ina ua mae’a talanoaina teuteuga tatau o le a fuafuaina a o lei tuuina atu i luma o le Fono Aoao Faitulafono a Samoa.
Ua faailoa foi e le Sui Palemia i lana saunoaga faalauaitele i le vaiaso nei, le amata foi ona talanoaina mataupu tau le Tulafono o Faiga Palota e le Pulega Faatonu.
Faaalia e le Sui Palemia o se tasi lea o Tulafono tāua e ao ona silasila toto’a i ai le Malo ina ia saogalemu le faatinoga o faiga filifiliga a le atunuu.
O nisi Tulafono tāua o lo agai foi i ai le Malo e pei ona faailoa lava e le Sui Palemia o loo faapena ona tapena teuteuga, o le Tulafono lea o Aupega ma le Tulafono e faatatau i aiga ma puipuiga o aiga ma fanau le Family Law.
