O le faai’uga o le tausaga 2020 na toe faia ai malaga a vaalele laiti o le Samoa Airways i le va o Upolu ma Savaii mai le malaevaalele i Faleolo ma aga’i ai i le malaevaalele i Maota, ae o Aperila o le tausaga e 2021 e tusa o faamaumauga na toe alu ai ana malaga i le malaevaalele i Asau.
E ui i le toe tatala o ia malaga i lena vaitau ae na toe taofia ona e maualalo le mana’oga o tagata i le va o motu.
O lea la ua toe faailoa e le pulega o le kamupani vaalele a le atunuu e ala mai i auala o faasalalauga a le Pulega o Tagata Tafafao, le toe tapena o le Samoa Airways e toe faia ni malaga i le va o Fagalii ma Maota ma o loo fuafua e tolu malaga i le vaiaso.
Ua faailoa ai e le asosi o tagata tafafao i le motu o Savaii le agaga fiafia ona o le a toe lele atu vaalele o le Samoa Airways auā ua siitia le mana’oga o tagata tulisi e fia asiasi i Salafai ma e mana’omia ai se auala vave o feoa’iga e pei o vaalele laiti o le Samoa Airways e na o le 10 i le 15 minute e malaga ai ae taunuu i Maota, ma lava ai le taimi e tafafao i le motu.
E lei faamautū se aso ma se masina e toe faaauau ai lea tautua a le kamupani vaalele i le va o motu o Upolu ma Savaii ae ua faailoa i le faasalalauga, o le taimi lava e faamautū ai se finagalo o le Kapeneta o le a amata loa ona faia ia malaga e lē gata e aogā mo tulisi tafafao ae o tagata foi o le atunuu e faimalaga i ni galuega faapisinisi i le va o motu, aemaise o le lautele o le atunuu, i latou e fia malaga i ni fuafuaga faavavave.
