O le vaiaso nei ua faamoemoe e usuia ai le fonotaga o le Atoa o Samoa lea o le a talimalo ai le faigamalo a Tutuila ma Manu’a, ma ua faailoa e le taitai o le Malo o le a auai atu iai ma lana usugafono.
Ua iai le talitonuga o le fono o le Atoa o Samoa i lenei tausaga, o le a toe faaauau ai talanoaga i le tele o nisi o mataupu tuua mai le fono mulimuli na usuia i Apia i le tausaga na tea nei i le masina o Oketopa.
E iai foi le talitonuga o nisi o mataupu sa faaiugafonoina ma faamautu i le fono lea, o le a toe asiasi iai talanoaga i le vaiaso nei, o le tulaga lea i le auina atu o fuamoa mai Samoa Tutoatasi i se tulaga faapisinisi ona o lea ua toe faavaatu’ia le maliega ona o aiaiga o Tulafono tau taumafa a le Malo tele o Amerika.
I le tapena ai foi o le faigamalo i Sasa’e i le faamanatuina o le 123 tausaga o lana Sisigafu’a lea e pa’ū tonu i le Aso Gafua asau le aso 17 o Aperila, ua faailoa i se lipoti a le faletelevise o le KVZKTV le auai o le afioga i le Ao Mamalu o le Malo ma lana masiofo i sauniga o le Fu’a ae o le valaaulia mo se aufaafiafia mai Samoa, ua le taunuu ona malaga se afioaga sa valaaulia ona o nisi fuafuaga lē maalofia.
O le feiloaiga talu ai nei a tusitala ma le taitai o le Malo le afioga i le tamaitai Palemia, na ia faailoa ai, o faiga masani a valaaulia le Ao o le Malo e auai i sauniga o le fu’a a Amerika Samoa, e lē malaga le Palemia, ae ua na o se Minisita o le Kapeneta e malaga ma le Ao o le Malo ma lana masiofo.
