Ua sauni le vaega faaupufai e puipuia aiātatau a tagata e finau lana talosaga ua i luma nei o le Faamasinoga Maualuga, ina ua faato’ilalo e le 34 o sui faipule o le itu a le malo, lana lafo o le lē faatuatuaina lea e to’asefululima sui faipule o le Itu Agai na lagolagoina ae to’atasi le sui faipule o le Itu Agai e le’i palota.
O le taunuuga o lea lafo ua faaauau ai pea le tauaveina e le sui faipule tamaitai o Lotofaga o le tofi Palemia ma faatumau lana ta’ita’iga i le pulega faatonu faatasi ai ma minisita uma e toaa sefulufā o lana Kapeneta.
O le 20 o faipule o le vaega faaupufai o le Faatuatua i le Atua Samoa ua Tasi sa latou tutū faatasi foi ma le Palemia ma le Kapeneta e teena le lafo o le lē faatuatuaina.
O le Aso Tofi o le vaiaso nei e toe valaau ai le finauga faaletulafono a le pati faaupufai o loo agaia le malo mo le toe faatulagaina o se aso e valaau ai mo le tuuina atu o finauga a loia mo itu o loo molia e pei o le vaega faaupufai o le Faatuatua i le Atua Samoa ua Tasi, o le Loia Sili a le malo, ma le Fofoga Fetalai o le Palemene faapea le afioga i le Palemia.
