O le tausaga e 1924 na faavae ai le asosi o tama ma teine tuai o Malisi i Samoa i le ta’ita’iga a le Pelesetene muamua ia Taisi Olaf Nelson ma o le tausaga lenei 2024 o lea ua atoa lelei iai le 100 tausaga talu ona faamaopoopo mai lenei mafutaga.
O le afioga ia Tuatagaloa Aumua Ming Leung Wai o ia lea ua seei mai i le tofi Pelesetene a le MBOPA Samoa i le taimi nei e ese mai i nisi o tamalii sa latou seei mai i lenei tofiga i tausaga ua tuanai.
O le loto faafetai ma le agaga fiafia o le afioga i le Pelesetene ia Tuatagaloa Aumua Ming Leung Wai i le Atua ona o lea ua atoa le 100 tausaga o le asosi ae o loo sologa lelei ma manuia mea uma.
O le Aso Sa, 28 o Iulai o lea ua fuafua e tatala aloia ai le vaiaso atoa e faamanatuina ai le 100 tausaga o Malisi.
O le tāua foi o lenei vaiaso o le a mafai ona mafuta ai tama ma teine tuai o le asosi o loo i Samoa ma atunuu i fafo, ae o le a galulue faatasi ai mo se isi sailiga seleni auā aoga a Malisi o loo i Samoa.
O le mafutaga a Malisi ua tupu ma ola e lē gata i Samoa ae faapena ma Ausetalia, Niu Sila ma Tutuila, ua fai si toatele o i latou ua auai ona o le loto aoga ma le faamaopoopo i aoga sa a’otauina ai le ola a’oa’oina e ala i le poto salalau.
O lea ua faailoa mai e le afioga i le Pelesetene ua iai nisi o mafutaga i fafo o lea ua taunuu atu i Samoa auā le faamoemoe o le MBOPA Samoa i le vaiaso fou.
Polokalame o le Vaiaso:
Aso Sa – Taulaga o le Misasa, ona sosoo lea ma le ‘ava o le feiloaiga ma faasolo atu ai i nisi o fuafuaga a le Malisi.
Aso Gafua – President Dinner o le taumafataga ua faapitoa mo pelesetene sa latou faafoeina mai lenei mafutaga aemaise ai o pelesetene o loo ta’ita’ia mai isi vaega o le asosi i isi atunuu faatasi ai ma Samoa.
Aso Lua – faia le savali i le taulaga i Apia ae faai’u i luma o le fale o le malo o loo faatali mai ai le ta’ita’i o le atunuu le tamaitai Palemia ia Fiame Dr Naomi Mata’afa, auā se saunoaga faamalosi’au mo le asosi. A mae’a le savali ona taualuga lea i le galuega i le teuina o fanua o felela i Moamoa faatasi ai ma le tuugamau o le pelesetene muamua o le Malisi ia Taisi Olaf Nelson.
Aso Lulu – faatino le tauvaga aloga paopao mai fale e fā ua vaevaeina iai le asosi.
Aso Tofi – fuafuaina ai le tausala online a le mafutaga auā se isi seleni mo le aoga.
Aso Faraile – tuuina atu iai se aso taalo mo tagapolo, ae taualuga i le afiafi i le music festival e faafiafia uma ai tamafanau a Malisi e aunoa ma se totogi.
Aso Toonai – toe faaauau isi taaloga ma afeleti mo le asosi, ae faauma ai i le po i le corporate dinner ma tauaaoina ai ni pine e sefululima mo nisi o tama ua filifilia e le asosi e aloaia ai le latou tuatua i totonu o Malisi.
Aso Sa – toe taualuga iai polokalame o le vaiaso e ala i le Taulaga o le Misasa ona sosoo ai lea ma le toonai e fiafia ai ma faamavae ai ma sui o le MBOPA o le a toe malaga mai i atunuu i fafo.
