E toalua ni tagata faigaluega a le Mālō o se alii ma se tamaitai ua nofo taofia nei i le vaaiga a leoleo i le falepuipui i Tanumalala ma ua molia i le umia o le pauta faasaina o le aisa faapea ma nisi o auupega faasolitulafono i le atunuu.
O nei aupega e aofia ai ni tama’i fana laiti e le faatagaina ma le umia o ni laau malosi se lua o le ituaiga o le pulu tasi poo le 22 ae le’i lesitalaina faaletulafono. E le’o mafai e leoleo ona faailoa suafa aemaise o le auaunaga a le Mālō o loo galulue ai i laua ia ae ua faailoa e nisi o auala o faasalalauga i totonu o le atunuu o i laua ua taofia o ni tagata faigaluega i le Ofisa o le Komisi o Faigapalota.
O le osofaiga a leoleo i Nuu Fou i le Aso Lua i le fale o le alii 38 tausaga le matua ma maua ai auupega ma le aisa faapea paipa e ula ai lea fualaau faasaina. E lata i le $3000 tala se tino i tupe na maua ai foi e leoleo i le fale i le taimi o le osofaiga.
Taua e le tamaitai Sui Komesina o le Matagaluega o Leoleo Monalisa Tiai Keti “ o le galuega lenei (osofaiga) sa fua mai ona o se faamatalaga sa faapea ona faaoo mai i le Ofisa nei ma galulue ai loa vaega a le Intel ma le CID Matagaluega ma agai ai loa le galuega lea i le afiafi ananafi (Aso Lua). E fai lava si tele o auupega malosi e pei ona maua mai e le Matagaluega e le gata o auupega malolosi ae o loo maua ai foi ma ni fualaau faasaina.”
E 29 tausaga le matua o le tamaitai ua molia faatasi ma le alii 38 tausaga le matua ma o le Aso 31 o Ianuari 2022 o le a tutula’i ai i laua i luma o le faamasinoga.
