Ua tuuina atu e le Faamasinoga Maualuga a le atunuu se poloaiga lē tumau poo se interim order, ua taofia ai le afioaga o Afega mai le toe faatino o le galuega i tuaoi o o latou eleele lea ua iai le faaiuga a le Faamasinoga o Fanua ma Suafa, ia tulai ese uma aiga o le afioaga o Leauvaa ua latou nofoia ma faaaogā faasolitulafono ia fanua.
O le Aso Lulu o le vaiaso nei na aumai ai lea poloaiga lē tumau a le afioga i le Faamasino Sili le afioga Satiu Simativa Perese, a o tālia ai finauga faaletulafono i mataupu faalefaavae e pei ona finauina e le Loia Sili o loo tauaveina le itu a le Faamasinoga o Fanua ma Suafa aemaise o le loia mo le itu a le nuu o Afega, e lē mafai e le Faamasinoga Maualuga ona toe tagofia se mataupu ua iai se faaiuga a le Faamasinoga o Fanua ma Suafa.
O le Aso Tofi o le vaiaso nei lava e faaauau ai le suesueina o lea mataupu e le faamasinoga sili, a o taoto ai le poloaiga lē tumau ua aumai e le Faamasino Sili lea o le a toe tagofia i ni finauga faaletulafono poo submissions mai loia a itu auai.
Na faailoa e le loia a le itu a le nuu o Afega i le faamasinoga e lē talafeagai i le faamasinoga ona faia se poloaiga ae lei tuuina atu se latou finauga, peitai na faailoa e le Faamasino Sili i le tamaitai loia o Tanya Toailoa, o lana folasaga i suesuega auiliili o le mataupu o le a avanoa ai lea tulaga.
O le tamaitai loia le afioga Sala Josephine Stowers o loo tulai mo le talosaga a le nuu o Leauvaa.
