Ua faailoa e se tina o se faletua o se tamalii sa avea ma faipule o le Palemene ua tuumalo, lona loto mafatia i le tuuaia sese o lona toalua i le fano o le soifua o Tuuau i le faalavelave i Vaitele uta lea na soa ai ese taavale le ua maliu ia Aperila o le tausaga e 2021.
O mafatiaga o le tina le afioga Tupuola Matimaivasa Vaele Sekuini Iona, ua faaleo i se tusi a le tina ua tuuina atu i le Komesina o leoleo, ma le talosaga ia faia se suesuega i tagata ua latou faia ia tuuaiga sese i luga o upega tafailagi le social media.
Sa saili se avanoa e feiloai atu ai i le Komesina o leoleo le tofa Auapaau Logoitino Filipo, ae mānava galuega o le Aso Lua e lei fesootai mai lana failautusi sa ia fautuaina le tuu atu o numera o la’u telefoni e fesootai mai ai.
I le tusi a le faletua ia Tupuola na ave i le Komesina o leoleo i le aso 18 o Setema le Aso Lua o le vaiaso nei o loo ia faailoa ai le tele o aafiaga o lona aiga aemaise o ona alo, ma aiga o lona toalua ona o faasalalauga i le api o foliga ua faaleaga ai le faletua i se tuuaiga e faapea sa oo atu o ia i le Komesina ma faatoese ai ona o le mea na tupu.
Faaalia e Tupuola Matimaivasa i lana tusi, o loo silafia e le Komesina o leoleo e leai se tulaga faapea na tupu.
Ma o le tuualalo a le faletua o Tupuola Matimaivasa i le Komesina o leoleo, o loo iai auala faaletulafono e mafai ai ona suesueina tagata na faia ia tuuaiga sese ma lē sa’o.
O loo kopi le Palemia ma le Minisita o Faatoaga ma Faigafaiva i le tusi.
