O se sui tuai o le Palemene a Niu Sila ia Tuariki Delamere lea ua ia taua e tatau ona fai se ifoga a le Malo o Niu SIla i Samoa ona o le fa’alavelave na tulai mai i le tausaga e 1929 lea ua fa’aigaoina o le Black Saturday poo le Aso Toonai Pogisa.
O le aso 28 o Tesema 1929 lea na fai ai se savali filemu o le Mau i Samoa ae faate’ia i le faapapa mai o fana a leoleo a Niu Sila lea na vaaia Samoa i lea vaitau ma fasiotia ai tagata e to’a 11 aofia ai ma le taitai o le Mau le afioga ia Tupua Tamasese Lealofi III. O se aso pogisa tele mo Samoa.
I se tusi a Tuariki na ia taua ai o le fa’alauiloaina e le Palemia ia Jacinda Ardern o se faatoesega a Niu Sila i ‘Dawn Raids” i le tausaga e 1970 e talafeagai lelei lea ma le toe manatua ai o le “Black Saturday”.
Taua e lea sui afai ae fai foi se faatoesega e lē lava na’o le fa’aleo ae e tatau ona fai lelei se ifoga i Samoa.
Na fai foi se fa’atoesega e Helen Clark i le tausaga e 2002 i le faama’i lea na maliliu ai le toatele o tagata Samoa i le 1918 , manatu Tuariki e lē lava foi (its not enough).
Talu ai ona o le matuia o le fa’alavelave na tulai mai i le tausaga e 1929 na masa’a ai le toto o tagata Samoa na finau mo se saologa fa’atasi ai ma le taitai o le Mau, na taua e Tuariki e talafeagai le fai o se ifoga tele e fa’aali ai e moni ua salamo Niu Sila i nei faiga fa’akolone na aafia ai Samoa.
O le tusi a Tuariki na lomia lea i le “Letter to the Editor” a le Niusipepa a le Samoa Observer.
