Ua amata tapena nei se talosaga a le Malo o Samoa o le a lagolago ma opogi e le faigamalo a Amerika Samoa, i le faamoemoe e ave lea talosaga i le vaega e pulea taumafa a le Malo tele o Amerika mo se faatagaga e avatu ai i le teritori fua o faatoaga mai Samoa Tutoatasi i se tulaga faapisinisi, aemaise lava i fuamoa ma aano o manufasi.
Ua faailoa lea fuafuaga e le afioga i le Minisita o Faatoaga ma Faiga faiva le susuga Laauli Leuatea Polataivao Fosi Schmidt, ina ua mae’a le fono o le Atoa o Samoa sa usuia ma talimalo ai le faigamalo a Tutuila ma Manu’a i le vaiaso na tea nei.
I se avanoa na fesiligia ai le Minisita na ia faailoa ai, se fuafuaga tāua tele lea ina ia mafai ai ona saofaga oloa tau faatoaga ma isi oloa mai Samoa e ave e faatu i Amerika Samoa, ma tatala ai ma le faitoto’a e faaulufale atu ai i Hawaii ma isi setete o Amerika.
O se tasi o mataupu sa fesiligia ai le Minisita o Faatoaga ma Faigafaiva, o le tulaga i le maliega poo le Memorandum of Understanding le MOU na sainia i le fono o le Atoa o Samoa na usuia i Apia i le masina o Oketopa o le tausaga na tea nei, na tatala ai le faatau atu i le teritori o fuamoa ma toe tatala ai foi ona faaulufale aano o manufasi ma isi oloa tau taumafa e gaosia i aano o manufasi e pei o manu papalagi poo povi ma puaa poo meaituaolo.
Faaalia e Laauli o loo tatala pea lea tulaga ma e le o iai se suiga ae o loo ave o ni faaoso ma faamomoli, ae talia le talosaga ua galulue ai faigamalo e lua ina ia faamalieina Tulafono a le Malo tele o Amerika.
Faaalia foi e le Minisita o le tulaga e pei ona fesiligia ai e le senate a le faigamalo i Sasa’e le maliega na sainia, o mataupu ia faalotoifale i le faigamalo a Amerika Samoa e le oo iai se finagalo o le Malo tutoatasi.
Le afioga i le Minisita o Faatoaga ma Faigafaiva, susuga Laauli Leuatea Polataivao Fosi Schmidt.
