Ua taoto atu nei i le pulega o le kamupani vaalele o le Air New Zealand se tuualalo a le Malo o Samoa mo se pa’ū o pasese i malaga i le va o atunuu e lua, i le mae’a faailoa e le kamupani vaalele le siitia o ana malaga i le aofaiga e 12 i le vaiaso.

O se tali faaaloalo a le kamupani vaalele sa faia i Apia i le vaiaso na tea nei, sa auai le pulega mai Niu Sila sa saunoa ai le Sui Palemia le Minisita o loo vaaia foi le kamupani vaalele o le Samoa Airways le tofa Leatinuu Wayne Sooialo, na ia faafetaia ai le Air New Zealand i le faaopoopo o ana malaga i le va o Apia ma Aukilani, ae o se faafetai na polili atu i le talosaga mo se pa’ū o pasese i le taimi lenei o le luluti o le feoai o o tatou tagata i faiga malologa o le faaiuga o le tausaga.

O le itu mautinoa ua na o le kamupani vaalele a Niu Sila o loo faaloloto i le tele o tupe maua mai malaga tuusao i le va o Samoa ma Niu Sila e aunoa ma se isi kamupani vaalele o la tauva.

Sa na o le vaalele tele o le Samoa Airways sa toalua ma le Air New Zealand i tausaga ua tuanai, ae o le taimi nei ua le toe iai se vaalele tele o le Samoa Airways sa faia ia malaga i le va o atunuu e lua.