I le tuanai ai o le 3 masina atoatoa talu mai le Aso 9 o Aperila na faia ai le faigapalota tele a le atunuu, o lea lava e le’i mautū se pulega a malo ona o tulaga le mautonu ua iai nei upufai a Samoa.  

Ua aumai ai faalauaitele ni finagalo o le failautusi aoao o malo o taupulega faapea le failautusi o le faauluuluga o le Ofisa o malo o le Pasefika ma tatalo mai ai i taitai o vaega faaupufai a Samoa ina ia aloaia le tulafono ma usitaia le finagalo o le faamasinoga.

Ua faalia e se pepa o faamatalaga faalauaitele mai e le failautusi o malo o le Pasefika o lē sa avea ma Palemia o le Malo o le Atu Kuki le susuga ia Henry Puna, O Samoa i le saofaiga a malo o le Pasefika i le tele o tausaga ua mavae sa avea ma fetu pupula o pulega o malo lelei faapea lona tausia o taiala o pulega a malo faatemokarasi ma sa lotolotoi foi i le sailia o fofo i faaletonu sa aafia ai upufia a nisi o malo o le pasefika.

O faaiuga ua uma ona folasia e le faamasinoga maualuga a le atunuu ua faaalia e Henry Puna o le auala lea ua lima taitaina ai Samoa ia o gatasi ai ma lona faavae ma o lona finagalo ua ao i vaega faaupufai ona usitaia loa le faaiuga a le faamasinoga ina ia tauaofia le Palemene ina ia faataua ai manulauti ma taiala o pulega faatemokarasi e pei sa sau a’i pulega a Samoa i le tele o tausaga ua mavae.

Ua faailoa foi e failautusi o Malo o Pasefika poo le Pacific Forum o loo manino le aiaiga ma le taiala o le feagaiga o le Biketawa Declaration ua sainia ma malilie uma iai taitai o le Pasefika e lē aiaina e isi malo mataupu faalotoifale o se atunuu o se sui auai o lea feagaiga ae ao lava ona faaaloalogia e malo taitasi faiga ma pulega lelei faatemokarasi e fesuiai ai pulega malo.

Ua faaalia e Henry Puna o loo nofo sauni malo o le Pasefika e tuuina mail ana fesoasoani faapea le lagolago mo tagata uma o Samoa.

O le failautusi aoao o Malo o Taupulega ia Patricia Scotland ua ia faaalia i se pepa o faamatalaga ai le faaiuga o le vaiaso lona faanoanoa tele i tulaga loloto ua oo iai le lē mautonu o upufai a Samoa.

O le finagalo faalauaitele lona lua lea a le failautusi aoao e faasino i le tulaga ua iai nei le atunuu talu ona fetosoa’i solo finagalo lē mautonu o upufai ua iai nei Samoa.

 Fa’aalia e Patricia Scotland e tatau ia Samoa ma atunuu uma o sui o malo o taupulega ona faaaloalo ma usitai i le pule o le tulafono le rule of Law o le pito laau tauave lea a le faamasinoga. Ua aumai foi lana tuualalo ua valuvalusia ai finagalo o taitai o patī faaupufai a le atunuu ina ia tauaofia ai loa le Palemene e ala i le faalogo ma usitai i le tulafono.

O Samoa o se tasi o atunuu o loo avea ma sui o malo o taupulega a Peretania tele.