E momoli atu le faafetai tele i lo outou mamalu aemaise o Ekalesia ma Mafutaga sa tali mai e tusa ma le faatalauula atu mo le lagolagoina o le pili taufaaofi i le Palemene o Niu Sila a le alii faipule ia Teanau Tuiono, le Restoring Citizenship Removed By Citizenship (Western Samoa) Act 1982 Bill, poo le tulafono taufaaofi e toe faafoi mai ai le sitiseni Niu Sila o tagata Samoa sa ave ese faafuasei e Niu Sila i lana tulafono Citizenship (Western Samoa) Act 1982.
O le Aso Faraile na te’a nei na tauaao atu ai i le Ofisa o le Resitala i le Palemene I Niu Sila le lata i le 10,000 finagalo tusitusia (written submissions) sa faaamaopopoina e le Pacific Leadership Forum i le itupa Samoa (Taeao o Faiva) ma le Fono Faufautua a Samoa (Aukilani), faatasi ma le lagolago a le Mafutaga Soofaatasi Faifeau Samoa (Aukilani).
O loo faasolo pea ona tuuina i luga o le upega tafailagi a le Palemene o Niu sila le lisi o finagalo tusitusia sa faaaogā ai le upega tafailagi (online submissions). I le taimi nei ua 1,407 le aofai o online submissions ua faalauiloa lauaitele mai (publish). Peitai e iai le talitonuga o le tele e lei oo iai le galuega a le soākomiti (select committee).
O le laasaga o le a sosoo ai o le folasia lea o finagalo tuufofoga (oral submissions) i luma o le soākomiti i se taimi o le masina nei poo le masina fou. Ua na o i latou sa talosaga mo se avanoa e folasia ai finagalo tuufofoga o le a moomia i le vaega lea. O folasaga e faia i potu fono o soākomiti i le Palemene, peitai e iai le talitonuga e ono iai se avanoa e malaga mai ai le soākomiti i Aukilani.
O faalapotopotoga nei ma tagata taitoatasi ua faailoa mai o le a faia a latou folasaga tuufofoga (oral submissions). Ae faamolemole i latou sa talosagaina avanoa mo folasaga tuufofoga e faailoa mai.
1. Pacific Leadership Forum
2. Taeao o Faiva (PLF)
3. Fono Faufautua a Samoa (Aukilani)
4. Mafutaga Soofaatasi Faifeau Samoa (Aukilani)
5. ASA Foundation Trust
6. Tamasa Trust
7. Ta Tupu Foundation Trust
8. Waitemata Samoan Community Forum
9. Rev Toleafoa Leatuavao Tupai-Lavea (Ambassador for Children’s Rights of Samoa)
10. Aigagalefili Fepuleai-Tapuai (Youth Ambassador)
11. Angela Dalton (Auckland City Councillor)
12. Diana Bell (Stace Hammond Lawyers)
Tele pe itiiti o le a o tatou fesootai pea.
Soifua.
