O lea ua taunuu i Samoa ausoka mai Amerika Samoa, o Tonga, ma le Atu Kuki i le faamoemoe e tausinio i le vae muamua o le taamilosaga saili avanoa mo le Ipu o le Lalolagi i le taaloga soka.
O le Aso Faraile le faai’uga o lenei vaiaso e amata ai lea taamilosaga e faia i le malae soka i Tuanaimato.
O le a tala malae le taaloga a Tonga ma le Atu Kuki sosoo ai ma le taaloga a Samoa ma Amerika Samoa.
O ‘au e malolo o le a fetaui i le vaega lona lua o le taamilosaga ae o le ‘au e manumalo o le a taalo e saili ai le ‘au e sao atu i le vae lona lua o le sailiga avanoa mo le Ipu o le Lalolagi.
O le vaega lea o le taamilosaga o le a taaalo ai le ‘au e manumalo ma ausoka malolosi a Niu Sila, Tahiti ma Vanuatu ma o le masina fou o Oketopa ua faatulaga ai le vaega lona lua lea o le taamilosaga saili avanoa i le soka mo atunuu o le Oceania e pei ona tauva ai le ausoka a Samoa.
