Ua talia i le faaaliga ma le tauvaga o ata pu’e pupuu faavaomalo e ta’ua o le Focus on Ability International short Film Festival, se ata video na pu’eina e le tamaitai o Faaolo Utumapu e iai ona aafiaga tumau.
Ua faaigoaina le ata na pu’eina e Faaolo o le Dramatic Waves of Change e faatatau i aafiaga o le atunuu o Kilipati mai suiga tetele o le tau.
E pei ona silafia o Kilipati o se motu e fausia i amu e leai ni mauga maualuluga ae o le laufanua e laugatasi e pei o motu o Tuvalu, ma le Atu Malesala, o nisi o atunuu o le Pasefika e ogaoga tele o latou aafiaga ona o suiga o le tau.
Ua faailoa mai e Faaolo ina ua fesootai iai, o le a faato’ā talanoa i lana ata na pu’e pe a manuia ma mautulaga i le faaaliga o ata pu’e pupuu le Focus on Ability International Short Film Festival.
O le vaiaso nei na logoina ai Faaolo Utumapu e se faalapotopotoga faavaomalo e patino i le amana’ia ma le atina’eina o tomai mo tagata e iai manaoga tumau le talia o lana ata mo lea faaaliga ma tauvaga o ata pu’e pupuu.
O lea alo tamaitai o le atunuu na soifua mai e po lana vaai, ae ua ia ausia a’oa’oga maualuluga i Iunivesite ma o se tasi foi e iai ona tomai i le musika.
