Na saunoa le Palemia o Niu Sila Jacinda Ardern i le aso ananafi e faatatau i le mataupu i visa e pei ona laga ai i se lipoti a le Newshub i le aso ananafi le toatele o tagata o loo faatalitali pea mo talosaga o visa tafafao mai i le atunuu.
Fai mai la le palemia i se faatalanoaga ma le AM i le taeao ananafi o talosaga o visa o loo faagasolo i le vave e mafai ai i le taimi e ui i se vaega tele o talosaga o loo faagasolo mai tulisi fia malaga mai i le atunuu.
O Niu Sila latou te faataga tulisi poo tagata tafafao maimoa mai i le atunuu mai atunuu e pei o le UK ma Amerika e malaga mai e aunoa ma ni visa. Ua faailoa foi e le Newshub toeitiiti 30 afe o tulisi mai isi atunuu ua tuuina iai le ioega e ulufale mai ai i tuaoi o Niu Sila talu ona toe tatala i le masina o Me.
Talu le toe tatalaina atoa o tuaoi i le aso 1 o Aokuso e 61,534 tagata na talosaga mo visa ae na o le 26,332 talosaga na talia ma le 515 ua teena, o lona uiga pe a ma le 34,687 isi talosaga o loo faatalia pea.
Ua faailoa e le palemia i le asō i lea faatalanoaga ua mae’a faailoa atu e le ofisa o le immigration ua iai nei i latou i le tulaga ua mafai ona o latou faafoeina talosaga ua maua atu i se tulaga vave o lona uiga o le a vave foi ona kilia lea aofaiga ma o le toatele o tagata talosaga o loo talosaga e fia asiasi mai i aiga ae le o le malaga mai o ni tagata tafafao maimoa mai.
