Ua toe elia’e i luga e le faipule o Safata Numera Tasi i lana saunoaga i le Palemene le mataupu i le fesootaiga mo a’oga ma le kamupani na faatinoina le galuega o le faapipii o satelite e maua ai e a’oga fesootaiga initaneti e faaaogā ia latou suesuega i mataupu o le a’oga.
Faaalia e le sui faipule i lana saunoaga faalauaitele, e lē o lelei lea fesootaiga i aoga a lona itumalo, ma le isi itu e lē o lelei e lē lava masini komepiuta lea na ia ta’ua e na o le lua masini laptops poo komepiuta laiti i se tasi o a’oga.
Na tali iai le Minisita o Fesootaiga ma faamalamalama atugaluga o le sui faipule le afioga Leaana Ronnie Posini, ae na faauilavea ai le taitai o le Itu Agai le susuga Tuilaepa L Sailele Malielegaoi, ma ia fautuaina le minisita le afioga Toelupe Poumulinuku Onesemo, e avatu faamatalaga sa’o ona o ia e malamalama lelei i le mataupu lea, auā o ia na aumaia i Samoa fesootaigaa faaonapo nei i Samoa a o tulai i le taitaiga o le Malo.
Finagalo o le Minisita o Fesootaiga, Afioga Toelupe Poumulinuku Onesemo ma le taitai o le Itu Agai susuga Tuilaepa L Sailele Malielegaoi, i le mataupu i fesootaiga satelite mo aoga i le atunuu, a o faagasolo le talanoaina o le tala faaopoopo muamua o le Tupe.
O le Aso Lua na toe usuia ai le fonotaga a le Palemene ma o loo faaauau pea.
