O le afioaga o Vaiee lea ua agai ai le poloketi o loo galulue faatasi ai le faalapotopotoga o le Toomaga mo ē Puapuagatia ma le Iunivesite mai Lonetona.
O lenei poloketi ua autu lea i sailiiliga o fofo o sauaga o loo aafia ai tina ma tamaitai lea na auai ai nisi o le afioaga e aofia ai tamalii, o tina ma tupulaga talavou.
A o faagasolo ai le polokalame i lona aso muamua na tuuina ai le avanoa i sui auai i lo latou manatu i lenei polokalame ma lona faauigaina.
Na ta’ua i pepa o faamatalaga le amanaiaina e le afioaga ma sui auai o lenei poloketi ma lona sao i totonu o nuu ma afioaga ina ia faatumauina le nonofo fealofani o mafutaga i totonu o aiga aemaise ekalesia.
I le aso mulimuli o lenei faatalatalanoaga na faasoa ai manatu e ala lea i auala e ao ona tali atu ai i taimi e tutupu ai faafitauli i totonu o aiga, na faailoa ai e nisi le tāua o le amanaia o manatu mai isi e aogā lea e faufau ai aiga lelei ma aloese mai ai i sauaga o loo alia’e mai.
