O le Minisita o Tupe a le Malo le afioga, Lautimuia Afoa Uelese Vaai, sa ia tatalaina i lenei vaiaso le fono a pa’aga totino o le nofoaga tutotonu mo polokalame o suiga o le tau, lea o loo i Samoa e pei ona iai i Vailima i le nofoaga o loo iai le ofisa autu o le Faalapotopotoga o le Siosiomaga o le Pasefika le SPREP.
Na faailoa e le Minisita i le tatalaina o lea faatasiga o le nofoaga autu mo polokalame o suiga o le tau, o lana matāfaioi o le lagolago lea i le Faalapotopotoga o le Siosiomaga o le Pasefika i fautuaga o polokalame e fesoasoani ai i atunuu o le pasefika o sui auai o le faalapotopotoga.
O le tatalaina o lea nofoaga i le tausaga e 2019 sa amata ai lana galuega o le tufa ma faasoa atu i atunuu taitasi tomai aoaoina e lagolago ai i taumafaiga faasino i polokalame e tali atu ai i suiga tetele o le tau, ina ia foia ai nisi o faafitauli ma luitau o loo feagai ma atunuu o le Pasefika.
O le sui o le malo o Iapani i Samoa o se atunuu na ia faatupeina le fausia o le nofoaga, sa saunoa foi i le tatalaina o lea mafutaga ma ia faailoa ai o suiga o le tau e le nao ni atunuu o aafia ai ae o se faafitauli ua laugatasia uma ai malo ma atunuu o le lalolagi.
E lua aso o lea faatasiga.
