O loo tālia nei e le atunuu se tala mai le Komiti o Faalavelave Faafuasei i le au malaga mulimuli na faanofoesea poo saogalemu uma ae pe ua tatala i tua i le maea o le tolu vaiaso na faanofoesea ai.
E le’i toe maua se faamatalaga mai le taitaifono o le Komiti faapea le Faatonu Sili o le
Soifua Maloloina poo a mai le taule’ale’a na faanofoesea i le nofoaga faapitoa i le Maota gasegase i Motootua lea na maua i suesuega ua nofo ai le vairusi o le faama’i Koviti19.
O lea taule’ale’a o se tasi na malaga mai Hawaii i le faamoemoe e auai i le tautinoga mo le suiga fou o Aoao faamanuiaina i le suega ulufale i Malua mo lenei tausaga.
O le tulaga ua iai le atunuu ua faia tui muamua ma le tui lona lua o loo tumau pea faamaumauga a le Soifua Maloloina talu mai le Aso 20 o Tesema 2021, 96% tagata ua maea le tui muamua ae 86% tagata ua maea uma tui e lua o le vailaau o le AstraZeneca.
O fanau mai le 12-17 tausaga, 24,704 ua maea le tui muamua ae 17,887 ua uma tui e lua o pe vailaau o le Pfizer. Ua ave foi le tuualalo o le taitai o le ituagai i le Mālō e silasila i se tulaga ae faia loa tui lona tolu ina ia faamalosia ai puipuiga o le ola ma le Soifua o le atunuu ao saogalemu ai pea e le’i pipisi ai le faama’i.
