I le savalia ai nei o le fā tausaga o le poloketi miliona tala a le Malo, e ui ina feagai lea taumafaiga na faama’ite e le faigamalo o iai nei ma lavelave o faafitauli i lona pulea ma le faagaioia, ae o loo lilifa lagona i le faafetaia o lea poloketi, ma ua aumai ai le lagona e lē o lava le miliona o loo faasafua atu nei i Fono Faavae a itumalo e 51.
O le sui faipule o Satupa’itea le afioga Lautafi Fio Selafi Purcell, o le ta’ita’ifono o le Fono Faavae a le itumalo o Satupa’itea lea ua faamatuu iai vaegatupe muamua ta’i 700 afe tālā o le tufatufaga o le miliona lona tolu.
Sa ia faailoa mai o le poloketi lea ua mafai ai ona maua le suāvai i nisi o vaega o lona itumalo sa faaletonu ai lea vaega tāua e mana’omia tele mo le soifuaga o aso uma.
Le afioga i le sui faipule o Satupa’itea o le ta’ita’ifono foi o le Fono Faavae a lea itumalo palota i Puleono i Salafai, afioga Lautafi Fio Selafi Purcell.
O le afioga i le sui faipule ma sui o lana komiti ua aofia i le to’alima o itumalo faapalota sa sainia maliega ma le komiti o le poloketi o le miliona i le Aso Lulu o lenei vaiaso mo le faamatuuina iai o vaegatupe muamua o le miliona lona tolu.
O itumalo ia e aofia ai Vaimauga 1 i Upolu ma Faasaleleaga 5, Gagaifomauga 2, Satupaitea, ma Palauli 2 mai le motu o Savaii.
O le faai’uga o le vaiaso fou ua fuafua e maua ai i teugatupe a Fono Faavae a ia itumalo faapalota a latou ulua’i vaegatupe ta’i 700 afe tālā, ua aofia ai le vaegatupe e 160 afe mo tupe faaalu ia latou ofisa tutotonu o Fono Faavae.
O lona uiga o le vaegatupe e 540 afe o le a faaalu ia latou atina’e.
Ua maua nei le aofa’iga e 25 o itumalo palota i Upolu ma Savaii ua maua vaegatupe muamua o le miliona lona tolu.
