O falema’i faaitumalo o afioaga ma nuu i tua i Upolu ma Savaii lea ua amata mea i se polokalame faatino a le Matagaluega o le Soifua Maloloina sa tufatufaina ai faailoga mo falemai faaitumalo ua lautogia mo lenei faamoemoe.
Faailoa e le Pule Sili Lagolago a le Soifua Maloloina, Tagaloa Robert Thomsen o le uluai taimi lenei ua faatino ai lenei faamoemoe.
“O nei faailoga e tuuina lea i falema’i faaitumalo o loo lelei le faatinoga o le vaaia ma le teumaluina o lapisi faalesoifua maloloina e pei o nila, syringes, o mea e faaaogāina i fusiga ma isi aemaise o le faaaogāina o colored coded bins e tuu eseese ai lapisi mai auauanga a le falema’i.
“O le tulaga lava ia ia lelei le faatinoga o standards ma procedures auā lava le saogalemu e le gata i le aufaigaluega a o i latou foi o loo ulufale atu i falema’i nei.”
Ta’ua e Tagaloa o se tasi lea o vaega o le vaaia lelei o lapisi mai faatinoga o auauanga a le soifua maloloina.
“E tai 3 masina ma faatino asiasiga ua iai foi assesment tools e faaaogā e iloiloina ai vaega togia uma o le auaunaga.”
O falema’i i Poutasi ma Safotu lea na mauaina faailoga togia e tusa ai o iloiloga ma asiasiga a le Matagaluega i vaega uma e ausia ai le manulauti o le faamoemoe faatasi ai ma nisi o falema’i faaitumalo e aofia ai Saanapu, Leulumoega, Lufilufi, Sataua, Foailalo ma Satupaitea sa ausia nisi o togi.
E iai le faamoemoe o le a faatino foi lenei faamoemoe i le tausaga fou mo falema’i tele i Motootua ma Tuasivi faatasi ai ma vaega tuma’oti ina ia mautinoa le ausia o vaega uma mo le saogalemu aemaise o le tumamā i mea faigaluega o loo faaaogāina e le aufaigaluega i ana auaunaga.
