Ua matala ia sega le finagalo o matai o le afioaga o Salelavalu ma ua momoli i aao o leoleo nisi o le malosi o le nuu, o loo manaomia i suesuega i le gaioiga faasolitulafono o se faatoaga laau faasāina maruana na maua i se sailiga a Malu o le Malo i le Aso Toonai ua mavae.
O le ofisa o leoleo i Tuasivi na feiloai ai le Komesina o leoleo ma matai, lea na faaalia e le komesina le susuga Auapaau Logoitino Filipo, na aofia ai i matai sa latou feiloai ma le toalua o taulelea o le nuu o loo fia maua mo suesuega, e aofia ai ma lē na ia umia le laau malosi na aafia ai ni leoleo se toalua i ni manua e le tuga.
Toe toatasi e lei tuuina atu e le nuu i leoleo ma le isi toafa o loo manaomia foi, ma ua faaalia e le Komesina ua faailoa atu e matai, e taatia atu lo latou faatuatuaga ia i latou, o le taimi lava e maua ai ona faapena lea e momoli atu i le ofisa i Tuasivi.
Le Komesina o leoleo le susuga Auapaau Logoitino Filipo. O le taulealea na ia umia le laau malosi ma ia faapa ma manunua ai Malu o le Malo e toalua, ua molia i le solitulafono o le taumafai e faaoo le maliu, faaoo manua tuga, umia o se aupega matautia, ma le umia o laau faasāina.
E ese mai le toatolu o taulelea sa faasalalau suafa ma ata e leoleo lea ua maua le toalua ae toe toatasi o loo sailia e le nuu, e toafa isi tagata o le nuu o ni tama tane uma foi ua ave e leoleo suafa i matai e tuuina atu mo suesuega.
