Na sulu i le supamaketi lata ane se tama ma ona manu’aga tuga, ma i lipoti a leoleo o lea na faamanu’alia i se tasi o fale faatali pasi e lē mamao ma le supamaketi.
E tusa o le itula e 6 i le afiafi ananafi na sulu ane ai lē ua faamanu’alia i le New World i Manurewa ma faanatinati atu ai loa i le falemai i Middlemore.
E pau le tala mai leoleo e iai le feeseeseaiga na tulai mai i le fale faatali pasi ma o loo agai nei iai suesuega.
Na saisai mai ai e leoleo le alii e toatasi ma e oo mai i le taeao nei e lei toe iai se isi tala mai le ofisa o leoleo.
