O lea ua talia e le Faamasinoga Maualuga i se faaiuga a le afioga i le Faamasino Sili le afioga Satiu Simativa Perese, le talosaga a alii ma faipule o le nuu o Leauvaa ina ia faia se poloaiga e taofia ai le malosi o le faaiuga a le Faamasinoga o Fanua ma Suafa na talia ai le talosaga a le nuu o Afega e faatino loa le latou galuega o le fuaina o tuaoi o ona eleele e pei ona iai faaiuga a lea faamasinoga ua silia nei ma le onosefulu tausaga.
O le taofia o lea galuega ua poloaina ai e le faamasinoga sili i lana faaiuga le tuuina atu o se kopi o le iuga i le Komesina o leoleo, ma le Peresetene o Faamasinoga o Fanua ma Suafa.
O le a toe iai se isi fetuunaiga o lea faaiuga ua talia ai le talosaga a Leauvaa mo se poloaiga, pe a mae’a se tasi o galuega o le a alo iai le Faamasinoga Maualuga, o le iloiloina lea o finauga faaletulafono e faasino i teuteuga o le faavae na fausia ai le tulafono fou o Faamasinoga o Fanua ma Suafa, lea ua lu’i e le loia o loo tulai mo Leauvaa.
O lea iloiloga o le a aumai iai se pepa tusitusia o faasino ala mai le Faamasino Sili o le a faataoto mai ai le faagasologa o taualumaga o le iloiloga mo le silafia e loia e lē gata mo le nuu o Leauvaa, ae faapea le loia mo le afioaga o Afega, aemaise o le itu a le sosaiete a loia, ma le itu a le Loia Sili o loo tulai mo le Peresetene ma le Faamasinoga o Fanua ma Suafa.
Ua faailoa i le faaiuga ua talia ai le poloaiga e taofia Afega mai le toe faia o se galuega, se atugaluga o le Faamasinoga Maualuga i le toe faia e le faamasinoga o suesuega muamua poo le faamasinoga maualalao a le Faamasinoga o Fanua ma Suafa, o se isi faaiuga na lē usitaia ai le faaiuga a le Faamasinoga o Talosaga apili a lea faamasinoga na faia i le tausaga e 2018.
Na soloia e le Faamasinoga o Talosaga le faatulai ese o aiga e 18 o Leauvaa, peitai i se isi talosaga na faaulu e Afega i le tausaga na sosoo ai, na aumai ai le faaiuga a le faamasinoga o suesuega muamua ua poloaina le faatulai ese o aiga e silia i le toaselau.
Na tuuina atu le talosaga a Leauvaa e toe iloilo lea faaiuga ae sa lē talia.
Sa faailoa e le Faamasino Sili i lana faaiuga, masalo e lei silafia e le nuu o Afega le tusi a lē sa avea ma Faamasino Sili le afioga Patu Falefatu Sapolu, na tali ai i le talosaga a se tasi o matai tamalii o Leauvaa le afioga Sala Fili Lauano, sa fautuaina ai e Patu a o avea ma Peresetene o Faamasinoga o Fanua ma Suafa, ina ia faaulu se talosaga e tali ai i le talosaga ua faaulu e Afega ona ua mae’a ona taoto le faaiuga a le Faamasinoga o Talosaga toe iloilo o le 2018 na soloia ai le faatulai ese o nisi o aiga o Leauvaa.
O faaiuga uma o lenei finauga ua taoto, na faaalia e le Faamasino Sili, e leai se iuga o ese ai.
E tasi lava le pule o fanua o loo finau ai, o eleele e faasino i le afioaga o Afega i suafa o Fata ma Maulolo.
A o tālia ai nei se aso o le a faia ai finauga faaletulafono i iloiloga o lenei mataupu, e toatolu faamasino o le Faamasinoga Maualuga le supreme court e aofia ai ma le afioga i le Faamasino Sili, o le a seei i le faatinoina o lea galuega i se aso, o le a faailoa mai e le ofisa autu o faamasinoga i Mulinuu.
