O gaioiga solitulafono i le umia ma le faatauina atu o fualaau ma laaau faasāina e aofia ai ma le aisa, ua agai ai nei suesuega a leoleo i le aafia o nisi o taavale laiti laupasese poo taxi, i le faatauina o le aisa.

Ua faailoa lea tulaga e le Komesina o leoleo, falepuipui ma le toe fuata’ina ina ua fesiligia e tusitala, ma ia faailoa ai o se galuega a leoleo i Vaivase uta i le vaiaso na te’a nei, e tau saili se taulealea i se solitulafono tau faaoolima, ae maua ai ma se gaioiga o le faatauina o le aisa.

Faaalia e le Komesina e fetaui le taunuu o leoleo i le fale o le aiga e saili le tagata sa fia maua, ae agai atu ai ma taxi i le fale o le aiga ma faapena ona faia ai loa sailiiliga ma maua ai ua uma ona utu le aisa i taga pepa iila.

O taxi na afea le fale o le aiga o le latou galuega lea o le tiliva ma faatau le aisa.

O le fale taavale la’upasese o le DB na faaalia e le Komesina o Auapaau Logoitino Filipo e faamautu ai taxi na agai atu i le fale o le aiga i le afiafi o le aso na faia ai sailiga a leoleo.