O loo tau saili nei e leoleo se fesoasoani mai le lautele o le atunuu e saili ai se tamaititi 8 tausaga le matua o Saletele Fagaloa. I se faaaliga mai leoleo e faapea na leiloa mai le tamaititi e suafa ia KJ Selesitila, i le maketi i Fugalei a o faatau ai ni a la oloa ma lona tina.
O le 10 i le taeao o le Aso Lua, 5 o Iulai na lē toe vaaia ai e le tina lona alo, ma amata ai loa ona saili poo fea ua alu iai. Na leiloa mai lenei tamaititi a o ia ofuina se mitiafu lanu uliuli ma se ofuvae vae uumi lanu moana. Mo le silafia e le mamalu o le atunuu, e lē o mafai ona maua mai e le tinā se ata o si ona alo.
O le ofisa o leoleo na oo iai le sailiga mo se fesoasoani ma aumai ai le faasilasilaga a le matagaluega i le afiafi ananafi. O le leai o se ata o le tamaititi na taulimaina e lona tina ua lē mafai ai e leoleo ona faailoa foliga o le tamaititi mo le silafia ai e le atunuu.
O loo talosagaina e le ofisa o leoleo soo se tasi na te silafiaina se nofoaga poo se faamatalaga e uiga i si nei tamaititi o loo tau sailia, ia vave faafesootai ane se Ofisa o Leoleo o latalata ane pe valaau mai le telefoni numera 22222.
