E lua vaiaso ua tuu atu e le faamasino sili i loia a leoleo e tuuina atu ai se faamatalaga i le faamasinoga, e faailoa atu ai pe ua maua se alii 21 tausaga le matua ua na ioeina le solitulafono o le fasioti tagata pa’ivalea.

O Tesema o le tausaga na te’a nei na faatulaga e lau ai se faasalaga o le taulealea o Fialelei Vaifale Sepetaio peitai e le’i oo atu ma faia ai loa le poloa’iga e sa’ili e leoleo i se tusi saisai.

Na toe valaau lenei mataupu tau faamasinoga i le Aso Gafua o le vaiaso nei mo le lauina lava o se faasalaga, peitai e le’i oo atu foi lē o loo molia.

O le faamatalaga a le loia a le itu a leoleo, e lē o iloa e ia poo ua faatino e leoleo le poloa’iga a le faamasinoga, pe leai.

O Fialelei mai Samalaeulu ua tuua’ia i se gaioiga tau faaoolima na mafua ai ona maliu se taulealea e 22 tausaga le matua o Tuasivi ma Fogapoa.