O le nofoaga i King Street i Papatoetoe o lea ua faapaia ma suatia ai le palapala e fausia ai le fale auā le faalauteleina o le auaunaga ma le tautua a le Pasefika Family Health Group. 

O le auaunga lenei a le soifua mālōlōina o loo galulue ai le tele o tausi soifua a le tatou atunuu, e pei ona iai le afioga ia Galumalemana Vaifagaloa Naseri o loo ta’ita’iina lea tautua. 

O se faamāmā avega lenei mo le mamalu o le atunuu o loo autovaa atu i le falema’i a le Pasefika Family Health Group o loo alala ma aumau i totonu o Otara, Papatoetoe, Otahuhu faasolo atu lea i Flat Bush ae o lea ua maua le falema’i e lata atu mo latou e fai ai siaki pe a mana’omia le fesoasoani. 

Saunoa le afioga ia Galumalemana Vaifagaloa Naseri, e faalautele le auaunaga ma le tautua a le Pasefika Family Health Group aemaise ai o le pisi ua iai nofoaga i Panmure ma Manurewa ma ua fai foi si taumamao mo nisi o le mamalu o le atunuu, ma o lea na galulue lava ma toe vaavaai poo fea se isi nofoaga talafeagai e ono toe faatū ai se isi auauanga fou a le Pasefika Family Health Group auā le mamalu o le atunuu i tagata Maori ae faapea foi ia i latou o loo aumau i lea vaega o le itu i Saute o Aukilani. 

O le faapaiaina o le nofoaga fou i Papatoetoe na ta’ita’i ai e le susuga i le toeaina ia Rev Victor Pouesi o le ekalesia EFKS Puaseisei i Magele le sauniga lotu auā le amataga ma le faavae fou o le galuega. 

O le faalauteleina o le tautua a le PFHG e ala i le latou falema’i fou i Papatoetoe o le a faaitiitia ai faafitauli o loo tula’i mai i le tele o gasegase tigaina o loo aga’i atu i falema’i ma nonofo umi e faatalitali se foma’i. 

O le amataga o le galuega o loo ua faagasolo nei, ae iai le faamoemoe o le matagaluega a le PFHG e tatau ona oo atu i le faai’uga o le tausaga ua taoto mai se vaaiga o le galuega, ina ia oo atu ia Fepuari o le tausaga fou ua faaaogā le falema’i auā le tautuaina o le atunuu e ala ia latou gasegase aemaise o le faalauteleina o le tautua matavela a le Pasefika Family Health Gorup mo ona tagata Pasefika.