Ua lē avea le vāvāō o manatu na fesiligia ai le faai’uga a faamasino e toe suia ai le faai’uga e pei ona toe sola ai Samoa ma le manumalo o le tauvaga o le Tausala o le Pasefika i lenei tausaga fou.
E pei ona salalau ai i luga o fesoota’iga televavave faaonapo nei le social media, ni faitioga mai sui sa lagolagoina le tausala mai le atunuu o Tonga, ma tuua’ia ai le sui o Samoa sa avea ma se tasi o faamasino o le tauvaga sa faia i le atunuu o Solomona.
O le a sa’ili se finagalo o lea tamalii pe a taunuu mai ae o le faai’uga na faafofoga iai le to’atele sa maimoaina le tauvaga i auala o fesoota’iga tau televise ma le api o foliga, ua manumālō le Tausala o Samoa le tamaitai o Litara Ieremia-Allan, tulaga lua le Tausala o Tonga, tulaga tolu le Tausala o Amerika Samoa, tulaga 4 o le Tausala o Solomona ma le tulaga lima poo le 4th runner up o le Tausala o le Atu Kuki.
O le Tausala o Samoa na ia maua faailoga o le tausala pito ata lelei le Miss Photogenic, ma le faailoga o le tausala sa pito lelei lona taliina o fesili le Best Stage Interview.
