Tusia : Maina Vai
O se pepa o faamatalaga na tuuina i luga o le lautusi a le Malo o Samoa ua faailoa ai e faamaonia na solia ese Tamaita’i Tausima’i ma se avetaavale sa o le faanofoesea ai.
O le tuua ai e i laua nei o le nofoaga o le Finagalo Fealoa’i e Tolu i Vaoala ma agai mai ai i le Taulaga o Apia i le Aso Toanai na mavae nei ua suesueina nei e leoleo.
O fa’amatalaga e faapea na iloa e nisi o le aufaigaluega a le Matagaluega o Tupe le taavale (van) lea sa o ese mai ai laua ia o tū i le masini tala tupe i le Maketi i Fugalei na fesoota’i atu ai loa i le Komiti o faalavelave faafuase’i ma ripoti iai. O lea taavale e fitoitonu lava i le nofoaga o faanofoesea ai i Vaoala.
O le faamatalaga a le avetaavale na fai i le Komiti o Faalavelave Faafuase’i e faapea o ia ma le taavale na fuafua e agai mai e utu i le pamu penisini i Lepea poo se taimi o le afa o le lua i lea lava aso. Sa talosaga le Tamaita’i Tausima’i e fia sau i le masini talatupe ma la omai ai loa.
Ua faailoa e le alii avetaavale sa o la faaitete lava ma puipui mai le feoai ai i nofoaga sa iai…..e pei ona sa ia talimau ai pea i totonu o le taavale.
O nofoaga sa agai iai…mai Vaoala i le pamu penisini i Lepea, ona agai lea i le masini talatupe i le Maketi i Fugalei, e le silia i le 5 munute sa iai iina…na mae’a ona aga’i lea i le falema’i i Motootua faatoa toe fo’i ai loa i le Finagalo Fealoa’i e Tolu i Vaoala.
O loo ua i leoleo lenei mataupu mo a latou suesuega. O ananafi na salalau ai le tala lenei mai nisi i le atunuu ma saili atu ai ni faamaoniga e ala i le fesoota’i atu i le Taita’ifono o le NEOC faapea ai le Faatonu o le Matagaluega o le Soifua Maloloina peitai e tuuina mai lava le faasalalauga lenei mai le malo e lei tali mai lava.
