Ua solia e le Kamupani Vaalele a le Samoa Airways aiaiga o tulafono tau i fefaatauaiga i le faia o feagaiga e aumai ai le vaalele 737-800 lea ua taofi le aumai mo faigamalaga ae o loo feagai le Kamupani ma ni faafitauli tau tupe i aitalafu ma le gau o le kamupani vaalele.
O se silasila faaletulafono lea a le kamupani loia a le Latu Lawyers na ave ai e le malo e toe sailiili tulaga o loo iai le feagaiga a le Samoa Airways ma le Kamupani na lisi mai ai le vaalele tele. O le solia e le Samoa Airways o aiaiga o tulafono a Samoa faasino i le faagaioia ma le pulea o kamupani ua faaalia e le ripoti na folasia i luma o le Kapeneta o se ata manino i le faatamala o faatonu o le kamupani vaalele e faailoa i le malo tulaga pagatia tau tupe o loo faafesaga’i ma le Samoa Airways.
O loo taua foi i le ripoti o le faagaioiga o le kamupani Vaalele ae o loo feagai ma ia faaletonu tau tupe sa faamoemoe ai i le ato tupe a tagata lautele le au totogi lafoga e faatino ai ona manaoga ma le faataoto o se vaaiga mamao o le taunuuga o galuega e ona maua ai tupe faasili poo pōlōfiti (profit) ae o loo silafia e le Pulega ma faatonu o le Kamupani Vaalele e lē taunuu i se tualga manuia e fua lea i le $80 miliona tala o loo nofo aitalafu ai.
O loo silasila le malo e ono oo i le $180 miliona tala e toe totogi ai le lisiina mai o le vaalele 737-800, ma ua faailoa ai e le taitai o le malo le afioga i le tamaitai Palemia Fiame Naomi Mataafa e sili le toe faafoi o le vaalele ma togitogi le $180 miliona tala seia oo ina maea nai loo le faaaoga ma faaauau ai le lisi ae faatuputeleina ai aitalafu ma aafia ai pea le Kamupani Vaalele i ni tulaga ogaoga tau tupe.
O le tausaga e 2017 na tatala ai le feagaiga na osi ma faipaaga ai le Polenisia ma le Virgin Blue a Ausetalia, o le masina o Novema i le tausaga lava lea na toe amata ai malaga faavaomalo a le kamupani Vaalele a le atunuu ma suia lona igoa i le Samoa Airways. O le amata pipisi o le faamai o le koviti19 i le tau amataga o le tausaga e 2020 na amata faaleotnu ai malaga masani a le Samoa Airways ina ua tapunia tuaoi faavaomalo a le atunuu seia oo ina faia le faaiuga i le taimi o le faigamalo sa iai e toe faafoi le vaalele 737-800 na lisi mai i se kamupani vaalele i Meleisia. Na faia ai ma feutagaiga mo se isi vaalele lisi lea na faamautū i le tuasaga na tea nei, ma oo mai i le tausaga nei ua suia le faigamalo ua tu mai i le foe ua ese foi le latou silasila i le lumanai o le Samoa Airways ma taofia ai le auvatu o le vaalele i Samoa ae toe faafoi i le kamupani na lisi mai ai.
