I le tuanai ai o le masina talu ona maea le taligamalo a le atunuu i le fono a malo o le taupulega, o le Aso Tofi o lenei vaiaso na faatoa maua ai e nuu ma afioaga na auai i le teuteu faamatagofieina o nuu o afioaga ma itumalo, faailoga tupe e pine faamau ai le faafetai a le Malo i le latou lagolago. E oo lava i nuu o Savaii ma Upolu e le’i maua ni atunuu o malo o le taupulega e autu iai a latou tapenaga faamatagofie o aai ma faoa aai na maua faailoga tupe.

O le avanoa lea na momoli ai le faafetai ma le faamalo a le taitai o le Malo i pulega mamalu a alii ma faipule o nuu ma afioaga ile lagolagoina o le taligamalo aemaise o le galuega o le faamamaina o nuu ma afioaga. 

O le afioaga o Savaia i Lefaga ua manumalo i le tauvaga o nuu sa ave iai atunuu e autu iai a latou teuga aai, na maua le faailogatupe e 10 afe tala, O atunuu o St Vincent ma Grenadines sa autū iai teuga a Savaia.

O Faleatiu ua tulaga lua sa ave iai le atunuu o Antiqua ma Barbuda, tulaga tolu o Leulumoega sa autu a latou teuga aai i le atunuu o Barbados, o Tufulele i le tulaga 4 sa autū a latou teuga aai i le atunuu o Cameroon, tulaga lima ai le nuu o Vailuutai sa ave iai le atunuu o Bahamas, tulaga ono o Satuimalufilufi sa ave iai Tuvalu, tulaga fitu o le nuu o Samatau sa autu a latou teuga aai ile atunuu o Zambia, O Nofoalii ua tulaga valu sa latou teuina o latou laufanua i lanu o le fua o le atunuu o Belize, tulaga iva o le nuu o Tiavea sa autu a latou teuga aai ile atunuu o Aferika i Saute ma le nuu o Faleasiu ua tulaga 10 sa ave iai le atunuu o Brunnei Darussalam. Maua uma foi faailogatupe o afioaga ua mau tulaga i lea vaega.

O nuu e lei maua ni atunuu ae sa ma’eu foi a latou teuga aai ma fao a aai na mau tulaga le lima pito i luga sa maua faailogatupe. O nuu ia e aofia ai Nuusuatia ile tulaga muamua, Fusi Saoluafata ile tulaga lua, tulaga tolu o Lepa, tulaga fa o Vailoa Aleipata, ma le tulaga lima o le nuu o Lalomauga.

I Savaii e 86 nuu ma afioaga  sa auai i le tauvaga e ui e lei maua ni atunuu o malo o le taupulega e autu iai a latou teuga aai. O Tapueleele ua maua le tulaga muamua, tulaga lua o Fagamalo, tulaga tolu o Vaitoomuli, o le nuu o Patamea ile tulaga fa, o le nuu o Manase ua maua le tulaga lima, tulaga ono o Fatausi, tulaga fitu o Salimu i Faga, o Sāfua ile tulaga valu, Satoalepai i le tulaga iva ma le tulaga sefulu ua maua e le nuu o Faiaai. O le faailogatupe maualuga e sefulu afe tala, mo nuu e sefulu ua mau tulaga ile vaega i luga le top ten faasolo ane ai i faailogatupe tai 1,500 tala mo nuu e lei mau tulaga i le vaega o afioaga na ave iai atunuu o malo o le taupulega.

E lima afe tala le faailoga tupe maualuga mo nuu e lima e leai ni atunuu na ave iai, ma o le maualuga foi lea o le faailogatupe na maua e le afioaga na tulaga muamua i nuu e sefulu o Savaii le top ten.