E silia ma le 6 afe tagata na faatinoina le haka ta’uta’ua a Niu Sila i le faai’uga o le vaiaso ma ua toe aumai ai i fanua le matati’a o le haka aupito to’atele i le lalolagi, o se tulaga sa umia e Farani i le tuana’i.
Fai mai lipoti i le taeao nei e 6,531 tagata na faatinoina le haka, Ka Mate i Eden Park i le po anapo ma ua ausia ai le aofa’i e 4,028 na ausia e Farani i le 2014.
Na faailoa e le televise tasi o nisi iloga na aofia i lea aofa’iga tele o tagata Niu Sila e aofia ai le alii faasalalau mai se tasi o televise Amerika o Conan O’Brien ma le alii fai ata tifaga Taika Waititi faapea foi le alii fusu, Tooletai David Tua.
Sa faailoa e le amepasa o le faamoemoe lea o Dame Hinewehi Mohi i le Breakfast ua matua’i lagona lona mitamita ia Aotearoa ma o se po uigaese i le lagona tutū faatasi sa lagonaina i le naunau e toe faailoa i le lalolagi le mitamita o Aotearoa i ana aganuu o se tasi o ona malosiaga.
Na ta’ua e Mohi o se tasi sa tāua lona sao i lenei taumafaiga o le alii lauiloa a Niu Sila i le lakapi, Sir Wayne Buck Shelford ma sa auai ai foi i le po anapo.
Puna o Faamatalaga: https://www.1news.co.nz/2024/09/30/so-proud-of-aotearoa-organiser-on-bringing-home-haka-world-record/
