O galuega o loo faagasolo i le aveesea o suāuu mai le manuao o le Manawanui i le nofoaga o loo goto ai i ogasami i Saute o le motu o Upolu, ua faailoa ai i se lipoti lata mai e silia i le selau afe lita o le suāuu ua mae’a ona pamueseina.
Ua faailoa e le matagaluega o galuega tetele a le malo o loo iai le fuafuaga e sili atu loa i le 200 afe lita o le suāuu e aveesea, ona aga’i lea o le lagisi lea o loo iai i luga ni tane e pamu ese ia suāuu i tane tetele o loo i luga o le uafu i Apia.
O le vaiaso lenei ua faamoemoe e faatino ai lea fuafuaga, ae o le galuega o loo aveesea ai suāuu mai le manuao o le Manawanui o loo faatino e se kamupani o loo totogi e le malo o Niu Sila ae o loo mata’itū lona faatinoga e sui o le US Coast Guard faapea le vaega o le gataifale mai le matagaluega o fela’ua’iga ma galuega tetele a le Malo o Samoa.
