Ua tusa nei ma le 6 tausaga talu ona faia le tauvaga tautalaga faa-Samoa a le F.A.G.A.S.A. 

O le tāua o lenei  tauvaga tautalaga i fanau, o le mafai lea ona tautatala i le tatou gagana. 

Ia faaolaola, tapu’e, faafailele ma aputiputi ina ia matuā faaleleia atili le tautatala a fanau i le tatou lava Gagana Samoa. 

Ia mafai e fanau ona faalauaitele le aano moni o le manulauti. 

Ia faailoa o latou lagona, ma ia amanaia o latou leo. 

Ia aumai foi e fanau se a’oa’oga tāua mo le toatele. 

Ia mafai ona maua le lototoa e lauga ai i le tatou gagana, ma ia aua ne’i natia lagona pe saisaitia foi manatu, ae ia faailoa. 

Ia iloa e fanau o lana gagana o lona tofi lea mai le Atua. 

Ua tele le suiga ua iai le tauvaga tautalaga i lenei tausaga nai lo le tausaga ua mavae, e lē toatele ni fanau sa tausinio ai. 

Ae o le tausaga nei, e tusa lea ma le 84 tama ma teine sa tausinio i le manumalo. 

O le taulotoina o lauga, momoliina o le feau ma le lē fefe, tausisi i le taimi faatulagaina, ua siitia le maoa’e o lona faatāuaina. 

Ua lelei le faaleoina o upu o le gagana, o le fesuisuiaina o leo, ina ia gaua’i atu le aofia, o le mālie ma le tagi foi sa iloa i lea aso. 

O ituaiga taga eseese ia sa momoli mai ai le feau, Oka! ua maoa’e. 

O fanau afakasi ma fanau e lē lelei le faasamoa, ua siitia le maualuga o ē sa auai i lenei tausaga. 

Ua mafai ona faaali o latou manatu e ala lea i le faaleoina o latou lagona, aemaise ai le tāua o le feau o loo momoli mai i le manulauti o lenei tausaga. 

Sa mafai ona faaaogā pepa, e faamanatu ai a latou tautalaga, ma na faia ma le lototele ma le lē fefe. 

O le tauvaga tautalaga faa-Samoa a le tausaga 5 e 14 aoga; o le  tausaga 6 e 12 aoga; o le tausaga 7 & 8 e 11 aoga. 

O le tuuaofaiga o Aoga sa mafai ona auai alo ma fanau mo le tuavaga tautalaga faa-Samoa o lenei tausaga e 20.  

I le pitolaau a faamasino na momoli ai ni fautuaga mo fanau, ia fiafia e faaaogā le tatou lava gagana. 

O le tatou gagana e lē a’oa’oina, auā e faaaogā i aso uma. 

E amata mai lava i aiga, i mātua ma tagata o le aiga, auā o le faleaoga ma faiaoga muamua, o le aiga ma mātua. 

Mātua, e lē o le poto o lau tama e tautala i le Igilisi, ona faapea lea ua poto lau tama, ma e faatuatuana’i ai i le gagana o lou tofi lea mai i le Atua. 

Ae o le tamaititi e lua ona mafaufau (bilingual brains), o le tamaititi lena e sili ona atamai, e pei o suesuega a le aupopoto ma le ausuesue i nei vaitaimi. 

Ia aputiputi, faaolaola ma tapu’e ia matuā mausali le gagana, ma ia aua ne’i pa le gagana a fanau, ae ia fanafanau auā le lumanai manuia. 

TULAGA  

Tausaga 5 – (1) Tsidkeru Fonoimoana Simi (Finlayson Park School) (2) Fuapopo (Flat Bush) (3) Kiaan Lui Gatoloai (Flat Bush) (4) Stacey Alefosio (Rowandale School) (5) Kourtney Palesoo (Roscommon Road) Violet Telea (Lincoln Heights School). 

Tausaga 6 – (1) E toalua fanau na manumalo mai ai Sharleen Bella Vai-Rosebank School Christian Su’a (Flat Bush) (2) Beatrix Maso Ulberg (Mangere East Primary) (3) Malagamafaleupolu Tusega (Otahuhu Primary School) (4) Maya Faalalo (Mangere East School) (5) Merelina Salevao (Homai Primary School). 

Tausaga 7 – E tulaga tutusa – (1) David Samuelu (Sutton Park School) Areann Eli (Sutton Park) (2) Sene Samuelu (Lincoln Heights School) (3) Mary Pili (Robertson Road) (4) Iose Enoka (Kelston Intermediate School) (5) Vaine Emau Tupai (Henderson Intermediate School).  

Tausaga 8 – (1) Kalolo Ioane (Ferguson Intermediate School) (2) Irene Aiatia (Robertson Road School) (3) Joshua Lalomilo (Henderson Intermediate School) (4) Yasmin Leifi (Roscommon School) (5) Sonny Patuletufuga (Wiri Central School).  

O le  tulaga muamua e oo i le tulaga lima o tamaiti uma nei na faamanuiaina i le tauvaga tautalaga a Aukilani, o le a faapea ona toe maua le avanoa e tauva ai i le tauvaga tautalaga tele o le a faia mai i le maota o Samoa i le masina o Aokuso 15/08/2024. 

O fanau nei o le a tauva ma alo ma fanau mai i le motu i Saute- Dunedin, Kalaisetete ma Ueligitone. 

O le tauvaga tele lea a le FAGASA Aoao, o le a toe lu’iina ai le manumalo, ma toe tausinio ai nei fanau. 

O le sini ma le faamoemoe o lea tauvaga, ia mafai e alo ma fanau ona tauva ma isi fanau mai ia Niu Sila atoa. 

Ia iloa ai le tāua o le faaaogāina o le gagana, ma ia vaavaai foi alo ma fanau, e lē na o Aukilani o loo faatāua ai le Gagana Samoa, a o aoga uma i Niu Sila. 

Ia malamalama foi fanau, ua mafai ona a’oa’oina le Gagana Samoa i totonu o Aoga Amata, seia oo lava i Iunivesite, ma o le manuia lea mo alo ma fanau a Samoa i totonu o Niu Sila nei.