Ua tuanai masina e lua o lenei tausaga talu mai Ianuari 2024 sa pa’ū tau o suauu ma penisini i Samoa, ae o le masina fou lenei o Mati ua alu i luga tau o ia oloa manaomia.

Ua faailoa e le Minisita o Tupe le afioga Lautimuia Uelese Vaai i se pepa o faasalalauga ua faailoa ai tau fou o suauu ma penisini.

O le tau o ia oloa mo lenei masina fou o Mati ua faatulaga mai i le tau o suauu ma penisini o le masina o Ianuari 20-24 a le atunuu o Sigapoa.  

“Ua faalauiloa mai i lipoti ma iloiloga o maketi tau suauu le siitia o le tau o le suauu e mafua mai i feteenaiga o loo faaauau i Kasa (Gaza Conflict), faapea ai ma osofaiga o vaa la’uoloa i le itulagi o Sasa’e Tutotonu (Middle East region).

Ua faaalia ai popolega o le au faatau suauu ona e ono faaauau le aafia o suauu ona o feteenaiga ma osofaiga nei”… o le finagalo lea o le minisita i le pepa o faamatalaga.

O le Penisini ua siitia i le 11.8 sene i le lita mai le $3.12 sa iai i le masina o Fepuari i le $3.24 i le lita, o le Tiso o le a siitia i le 10.6 sene i le lita mai le $3.32 i le $3.43 i le lita, ma le Karasini o le a siitia i le 4.1 sene i le lita mai le $2.98 i le $3.02 i le lita.