Na faamatala e le tina loto faanoanoa ua tuua nei na o ia ma si a la fanau e to’aono, le tina ia Nu’ulua Faaofo, o ia sa manao la te o uma ma Uili i lalō i le taeao lena e piki mai tei o si ona to’alua e aumai i luga se’i o latou tafafao a o lei toe foi i Samoa, lona uiga semanū e iai ma ia i le van lea na lavea.
‘Sa ou fia alu ma te o, peitai na vavao a’u e Uili ma faapea mai, ou te nofo e faatali atu ma vaai tamaiti ae alu na o ia.’
Ua toe tōmānatu ai si tina faanoanoa ia Nu’ulua i se mea e sili atu ona matuitui semanū e tupu pe ana tulai mai lenei faalavelave na tupu i le State Highway 1 i Ramarama i le Aso Gafua na te’a nei, ae o la sa iai uma la’ua ma si ona toalua i le taavale ina ua lavea.
E to’aono si a la fanau, lea ua tuua nei na o latou ina ua motusia faafuase’i le mafutaga ma si ona to’alua, le tamā o si ana fanau, ina ua lavea le latou van na aga’i mai ai i luga i Aukilani ina ua pa pasae le pa’u o se loli la’u uta mamafa ma tifa ese mai le itu auala sa malaga ai ae tifa mamao atu i le isi itu auala o loo aga’i ane ai le van a Uili Faaofo ma lana aumalaga, faapea ma isi taavale na lavevea faatasi ai.
O le van sa aveina e Uili Faaofo, lea sa malaga mai ai ma ona tei e to’atolu o fanautama a ona tuafāfine o loo faatali mai i aiga i Samoa, ma isi tama e to’alua na latou omai uma faatasi.
O lenei faalavelave e pei ona mua’i lipotia atu, ua fano ai soifua o Uili Faaofo e 45 tausaga, ma ona nephews e toalua, o Leauga Jerry Leauga 37 tausaga, ma Taavao Kelemete 32 tausaga, ae o loo taofia i le falema’i le isi ona nephew o le uso laititi o Leauga i ni manu’aga tugā.
I se lipoti a le RNZ Pacific i le Aso Lulu, o loo faamatala ai e le tina faanoanoa si ona to’alua o se tamā e alofa tele ma galue mamafa mo le tausiga e lē gata i totonu o si o latou lava aiga ma si a la fanau, ae o Uili o se tagata e naunau tele e tausi uma atu ma lona aiga atoa.
Na ta’ua e le tina, e leai ma sona iloa ua vevesi le tele o faasalalauga i le faalavelave ua tupu ae na ia faato’ā iloa le faalavelave ina ua tu’itu’i atu leoleo i le latou fale i le afiafi lena o le Aso Gafua i le tusa o le 5pm i le afiafi.
