O le Sonelau Development Group o se faalapotopotoga o taulelea o le nuu o Vaitoomuli i Savaii, ua latou faia se atinae lelei tele o le gagauina o le vao e faato’a i laau tau faatoaga.
O Malaki Tito Malupo Taufao o se sui o le vaega ua ta’ua o le Sonelau Development Group, sa galue i se galuega faaofisa i le taulaga, ae na ia tuua ma toe foi i lona aiga i Vaitoomuli ona ua leai nisi o lona aiga, o nisi ua malaga i fafo.
O le tausaga e 2018 na ia amata ai se faatoaga ma nisi o taulelea o le nuu ma latou faaaogāina ai se fanua e tasi le eka, o le taimi nei ua 6 eka ua oo iai le tele o le faatoaga a le Sonelau Development Group.
O le fesoasoani tuusa’o a Ausetalia na talosaga iai le faalapotopotoga ma maua ai mea faigaluega e oo i se tanevai.
O le fesoasoani lea mo le tau la’u mamao o le vai mo faatoaga ona o le tanevai i le fesoasoani a lea Malo.
O le taimi nei ua tupu ma ola pea le taumafaiga a le faalapotopotoga ma le molimau a Malaki Tito Malupo Taufao, o le fesoasoani tāua lea ua maua mo tupe maua i lona aiga ma ua sili atu nai lo taimi o faigaluega.
O lana feau tau molimoli i tupulaga o le atunuu e lē o maua se galuega, e suamalie le ola galue ma atinae aemaise o le ola tautua i le nuu ma le aiga.
