Ua se’i e le puleganuu a Aukilani le laisene a le Beam Mobility lea sa faataga ai ona feoa’i ana e-scooters i Aukilani.

O lea ua sau le faatonuga a le puleganuu agai i le kamupani sau mai Singapore ia ta ane le 12 i le po anapo ua tape uma ana scooters lanu viole o loo i luga o auala ma ia ta ane foi le 5 i le afiafi o le Aso Faraile nei ua leai uma scooters nei mai le auala.

O se faaiuga ua oo iai ao tuuaia ai le kamupani ua ia solia le fuainumera faatapulaa e faagata ai scooters a kamupani o loo feoa’i i tua, e lē gata o le taulaga ao fafo mai o le taulaga o Aukilani.

E lē gata i lea ua ta’ua mai foi e le puleganuu, e pepelo faamaumauga o loo tuuina atu i lipoti a le kamupani ma e foliga mai o loo faalafi ai faiga piopio nei.

O le laisene ua sē’ia nei mai le Beam, e na o le 1400 ana scooters e faataga i Aukilani, aofia ai le 450 i le taulaga ma le 500 i fafo mai o le taulaga.

Ua toe faatoese le kamupani a le Beam aga’i i le puleganuu a Aukilani, ae mai le puleganuu ua faigata ona toe talitonuina.

Puna o Faamatalaga: Beam e-scooters axed from Auckland streets after investigation (1news.co.nz)