Ua faaulufale le ‘ala ma le mila poo le malumalu fou o le Ekalesia Katoliko i Leaupuni ma Tapatapao, ua fausia i se vaega o eleele tau Faumuina le Tupufia i le afioaga o Lepea.
O le malumalu fou o Sagato Ioane Viane ua sui ai le malumalu tuai na tuu i lalo i le tausaga e 2016, ma amata ai loa sailiga seleni i lena lava tausaga seia oo ina mae’a ma faaulufale i le aso 28 o le masina na te’a nei o Aokuso.
E tasi le miliona, 246 afe tala le tau atoa o le galuega, ae valu tausaga o faagasolo le fausia o le malumalu ona e lē gata o tulaga tau seleni sa saili, ae o le faama’i Koviti-19 na nofo ai le galuega mo le 11 masina ona o vavao e mafua i puipuiga o le atunuu atoa mai lea faama’i.
Faaalia e le failautusi i le tala o le galuega na folasia i le sauniga o le misasā na faapaia ai le malumalu fou, e lima matāfale na amata le galuega o togi maa, ae alu alu oo ina faaopoopo matāfale e 6 ma ulugalii e to’alima na lagolago malosi atu i le faatupeina o le galuega.
E silia i le lua eka le telē o le fanua e pulea faa-Sa’o e le suafa Faumuina le Tupufia o le afioaga o Lepea ua faamatuu mo le lotu, ae 20 isi eleele lava tau i le suafa Faumuina le Tupufia ua lisi atu mo aiga uma o le Ekalesia Katoliko i Leaupuni ma Tapatapao e nonofo ai ma tautua le galuega.
O se vaega o le saunoaga a le Afioga Faumuina Opapo Oeti o loo seei i le suafa i le sauniga o le Misasā na faapaia ai le malumalu ua faaulufale, e ala i faasalalauga a le Upu Mana TV a le Ekalesia Katoliko i Samoa.
O lea sauniga sa ta’ita’i ai le afioga i le Akiepikopō o Mosese Vitolio Tui ma o loo iai le talitonuga o se malumalu fou lea o le Ekalesia Katoliko o le Puleaga a Samoa Apia ua faaulufale talu ona avea le afioga Mosese ma ta’ita’i aoao e faauluulu iai le Puleaga.
