O le kolisi o a’oa’oga tau matātā eseese a le malo o Ausetalia o loo i Samoa o se tasi o punāvai o le poto a’oa’oina ua maua ai tusipasi ma faailoga o le to’atele o alo a fanau a Samoa.
O le tausaga nei e to’a 89 ua faau’u mai ai, ma o lea aofa’iga e 40 tamaitai ae 49 alii.
O le to’asefulu o tamaitai mai lea aofa’iga atoa ua latou ausia tusipasi i le matātā o le palama ma le fausia o ālavai poo le plumbing and water drainage.
Ua faatūina ai e tamaitai se matati’a i lenei tausaga i le to’atele ua latou ausia lea tomai tau matātā eseese sa masani ona fulisia i le itupa o tama tane.
O se tasi lea o faamaoniga o le faai’uga o su’ega a fanau uma a le atunuu e pei ona sa faailoa e le Ofisa Sili o le Matāgaluega o A’oga ma Aganuu i se feiloa’iga ma tusitala i le masina na te’a nei, o le pa’ū maualalo o le taumafai o alii ae maualuga pea le itupa o tamaitai.
O le aufaau’u o lenei tausaga ua maua faailoga ma tusipasi i matātā o le kuka poo le saunia ma le gāseseina o taumafa, o matātā o le palama, fausia o ālavai, faaleleia o taavale poo light vehicle mechanical technology, o le folaina o le maa mo maota ma laoa poo le wall and floor tiling ma nisi ua maua tusipasi i tomai i galuega tau tagata tafafao poo le tourism.
