O le Mafutaga Tatalo mo se filemu i Isaraelu o se faalapotopotoga ua auai ma nisi o tagata Samoa mai tapuaiga ma lotu Kerisiano eseese.

O le Aso Toonai na tea nei sa faatumulia ai lumāmaota o le Malo i le eleele fou i sui lagolago o lea mafutaga i se latou savali na faalauiloa ai lo latou tutu faatasi e lagolago se filemu i Isaraelu, a o faaauau pea le taua a fitafita ma vaegaau a lea Malo ma le vaega faatupu faalavelave o tagata Palesitina ua ta’ua o le Hamas.

O le sauniga i luma maota o le Malo na laugaina ai le tāua o le tatalo mo se filemu o Isaraelu ma le lalolagi atoa, a o faaauau pea le taua ua vaeluaina ai lagona ma mafaufau o tagata ia i latou e lagolagoina Isaraelu ma ē e fulisia i tagata Arapi e lagolagoina Palesitina.

O le savali i le faaiuga o le vaiaso o se tasi lea o vaaiga amata o le tausaga fou sa faatumulia ai lumāmaota o le Malo i le taulaga o Apia.