O le sauniga sa faamanatuina ai le aso o aiātatau a tagata e le gata i Samoa ae o le lalolagi atoa sa taimua ai le Ofisa o le Komesina o Sulufaiga ma le Ofisa o Malo Aufaatasi i Samoa nei.

Na saunoa ai le Sui o Malo Aufaatasi i Samoa, Themba Kalua e uiga i le faatāua ai o lenei aso.

“Ua faamanatuina lenei aso i se sauniga, le aso o aiātatau ma o se aso foi e atoa iai le 75 tausaga talu ona iai le Universal Declaration of Human Rights.

“O lenei tautinoga o loo maioio ai tulaga o aiātatau e ao silafia e aofia ai le saolotoga i tapuaiga, faaaliga o manatu ma lagona, saolotoga mai sauaga aemaise o vaega e pei o le soifua maloloina, o taumafa, o le soifua faalotoifale, avanoa i galuega ma aoaoga.

“O lenei foi tautinoga o loo atagia ai le amanaia o tagata taitoatasi i avanoa tutusa ma aiātatau faaletagata soifua.

“O le faatino ai o lenei sauniga i le Maota Tatalo a le Malo ona o vaega uma o loo tusia i lenei tautinoga e ogatasi lea ma le faa-Kerisiano.”

E pei ona iai le tapunia o le polokalame 16 aso mo faatinoga e taofia sauaga i tina ma tamaitai, na ta’ua ai e Kalua ia mautinoa le saogalemu o tagata uma.

“O le aganuu faa-Samoa o loo malu ai le atunuu ma o tu ma agaifanua o loo faapupula mai ai vaega o le tautinoga e pei o le faaaloalo.

“A o tatou faamanatu ai lenei aso ia tatou tomanatu i aga faa-Kerisiano, o le aganuu ma aiātatau i ona vaega eseese o loo taialaina ai lo latou ola i lenei lalolagi.”